Ni ku nshuro ya kabiri Kenny Sol agiye kugaragara muri ibi bitaramo, kuko aheruka kuririmbamo mu 2023, mu gihe iri serukiramuco ryari rimaze gufata indi ntera mu kuzenguruka Intara zitandukanye z’u Rwanda, rihuza abahanzi bakomeye n’abakunzi babo mu buryo bwagutse.

Thank you for reading this post, don't forget to subscribe!

Kenny Sol agarutse muri MTN Iwacu Muzika Festival asanga hamaze gutangazwa undi muhanzi ukomeye, Kevin Kade, wabimburiye abandi ku rutonde rw’abazaririmba muri uyu mwaka.

Kugaruka kwe si inkuru isanzwe ku bakunzi be. Mu myaka ibiri ishize, Kenny Sol yakomeje kwagura izina rye mu muziki nyarwanda no hanze y’u Rwanda, agaragaza ko ari umwe mu bahanzi bafite ijwi rihariye, imiririmbire yuje ubuhanga n’imitegurire yihariye ku rubyiniro.

Mu 2023 ubwo aherukaga muri iri serukiramuco, yagaragaje ko ashoboye guhuza umuziki wuje amarangamutima n’ubyinitse, ibintu bituma aba umwe mu bahanzi bakurura imbaga y’abakunzi b’umuziki w’iki gihe.

Kenny Sol ni umwe mu bahanzi bagezweho binyuze mu ndirimbo zakunzwe cyane zirimo ‘Say My Name’, ‘Umurego’, ‘Quality’ yakoranye na Double Jay ndetse na ‘One More Time’ yakoranye na Harmonize.

EP ye yise Stronger Than Before na yo yagaragaje indi sura y’ubuhanzi bwe, aho yibanze ku butumwa bwo kwiyubaka, gukomera no gukomeza urugendo nubwo haba hari imbogamizi.

Izi ndirimbo n’izindi nyinshi yagiye akora zatumye aba umwe mu bahanzi bafite abakunzi benshi cyane mu rubyiruko, by’umwihariko abakunda R&B n’umuziki uvanga amajwi y’iki gihe n’inyikirizo ziryoshye.

MTN Iwacu Muzika Festival ni imwe mu mishinga ikomeye yagiye ifasha kuzamura impano z’abahanzi no kwegereza umuziki abawukunda mu turere dutandukanye. Kuba Kenny Sol yongeye gutumirwa nyuma y’imyaka ibiri, bigaragaza icyizere abategura iri serukiramuco bamufitiye ndetse n’urwego amaze kugeraho.

Abakunzi be biteze ko kuri iyi nshuro azagarukana imbaraga nshya, indirimbo nshya n’imyiyereko irenze iyo yagaragaje mu 2023.

Mu gihe andi mazina y’abahanzi azagenda atangazwa, kugaruka kwa Kenny Sol byamaze kongera urwego rw’icyizere ku bazitabira MTN Iwacu Muzika Festival y’uyu mwaka, aho benshi batangiye kwibaza indirimbo azahitamo kuririmba n’udushya azazana ku rubyiniro.

Ibi bitaramo byitezweho kongera kuba umwanya wo guhuza abahanzi n’abakunzi babo, no gukomeza gushyira umuziki nyarwanda ku rundi rwego.